Sa patuloy na paglalakbay ng Pilipinas sa Miss Grand International 2025, unti-unting lumalabas ang mga kontrobersya at usaping bumabalot sa beauty pageant na ito. Matapos ang sunud-sunod na tagumpay ng mga Pilipina sa iba’t ibang international pageants, marami ang umaasang patuloy ang tagumpay ngayong taon. Ngunit iba ang sitwasyon ngayon sa Miss Grand International (MGI). Lumalabas na hindi lang kagandahan, talino, at talento ang mga tinitingnan, kundi pati na rin ang kakayahan ng mga kandidata na kumita ng malalaking halaga mula sa voting at live selling ng mga produkto ng MGI.

Sa isang panayam, inilahad ni Nawat Itsaragrisil, ang chairman ng MGI, na ang isa sa pinakamahalagang batayan sa pagpili ng mananalo ay kung sino ang kandidatang makakapagbenta ng pinakamalaking halaga ng mga produkto ng pageant. “Kung may iisang pipiliin ako, yun ang pinaka-popular. Sino ang may pinakamalaking benta at boto,” ani Nawat. Kaya hindi na lamang ang ganda ng katawan, talino, at kaalaman ang pinapansin—kundi pati na rin ang halaga ng pera na mapapasok sa kanilang sistema.

Hindi na bago ang ganitong klaseng sistema, ngunit mas lalong lumalalim ang usapan nang malaman na ang popular votes ay nagkakahalaga ng 30 Thai baht kada boto, o higit Php62. At upang makamit ang mataas na boto, kailangang makapagbenta ang kandidata ng daan-daang libo, o maging milyon-milyong boto upang maka-angat sa ranking. Sa kasalukuyan, pumapangatlo lang ang Pilipinas sa popular votes, habang nangunguna ang Tanzania.

Isa sa mga naging usapin na nagbigay-liwanag sa sistemang ito ay ang pag-alis ng Miss India sa Miss Grand International 2024. Ayon sa balita, hindi na kinaya ng kandidata ang matinding pressure ng pagbebenta at pagkolekta ng boto mula sa mga produkto ng pageant. Ang sitwasyong ito ang nagpatindi ng usapin tungkol sa kung gaano talaga kahalaga ang pera sa pagpili ng mananalo.

Bukod sa voting, parte rin ng kompetisyon ang live selling ng mga produkto ng MGI na gaganapin sa mga darating na araw, kabilang na ang National Costume Competition sa October 13 at Preliminary Competition sa October 15. Ayon sa mga balita, kailangan ng bawat kandidata na magbenta upang magpatuloy sa kompetisyon. Ang sinumang makakabenta ng pinakamaraming produkto ang magkakaroon ng espesyal na karapatan sa susunod na mga round.

Para sa marami, tila naging isang business competition na ang dating beauty pageant na puno ng mga adbokasiya. Ang mga kandidata ay hindi na lamang ipinagmamalaki ang kanilang kagandahan at talento, kundi pinag-iisipan kung paano makabenta ng mga produkto upang manatili sa kompetisyon. Ang ganitong sistema ay nagdudulot ng pag-aalinlangan sa mga tagahanga kung tunay pa ba ang pagkilala sa kagandahan o ito na lamang ay pagkilala sa kakayahan sa pagbebenta.

Sa kabila nito, may mga nagbabala na hindi nila hinihikayat ang mga tagasuporta ng Pilipinas na maglabas ng malaking halaga ng pera para bumili ng boto o produkto. Ayon sa kanila, sapat na ang suporta sa pamamagitan ng likes, shares, at comments sa social media upang ipakita ang pagmamahal at suporta sa pambato ng bansa.

Isa pang kritisismo sa sistema ay ang tila paggamit sa mga kandidata bilang mga “sales girls” na kailangang magbenta ng mga produkto na kung minsan ay wala sa kanilang kakayahan o interes. Hindi na umano ito ang tunay na diwa ng beauty pageant na dapat ay nakatuon sa mga adbokasiya, ganda, talino, at kakayahan.

Kung titignan, naiiba na ang landas ng Miss Grand International. Mula sa isang plataporma para sa empowerment at pagpapakita ng mga advocacies, naging isang negosyo na ngayon na ang mga kandidata ang nagsisilbing pangunahing instrumento para kumita ng malaki ang pageant.

Habang papalapit ang mga susunod na paligsahan, nananatiling tanong sa puso ng mga Pilipino kung ang pagkakapanalo ba ng kanilang kandidata ay dahil sa tunay na ganda at talento, o dahil lamang sa dami ng pera na naibenta at boto na nakuha sa live selling.

Marami ang umaasa na sa kabila ng ganitong sistema, mananalo pa rin ang Pilipinas nang patas at hindi dahil sa pera lamang. Dapat pa rin sana ay ibatay ang tagumpay sa kagandahan, talino, at mga adbokasiyang tunay na naglilingkod sa bayan at lipunan.

Ang Miss Grand International 2025 ay magbibigay sagot sa mga tanong na ito sa mga susunod na araw. Hanggang kailan magpapatuloy ang ganitong sistema? At makakamit pa ba ng Pilipinas ang panibagong tagumpay sa kabila ng mga bagong hamong ito?