Hindi lahat ng ngiti ay totoo. Minsan, sa likod ng mabait na mukha ay may nakatagong galit, inggit, at balak na pumatay.

Noong Enero 6, 2016, yumanig sa buong Indonesia ang biglaang pagkamatay ng isang 27-anyos na babaeng si Mirna Salihin matapos lamang uminom ng kape sa isang sosyal na café sa Jakarta. Pero ang mas nakakabigla? Ang itinuturong pumatay sa kanya ay walang iba kundi ang matalik niyang kaibigan—si Jessica Kumala Wongso.

Magkaibigan sa Lahat ng Aspeto

Si Jessica Wongso ay ipinanganak sa isang mayamang pamilya sa Jakarta, Indonesia. Laki sa karangyaan, lahat ng luho ay kayang ibigay ng kanyang mga magulang—mula sa marangyang bahay, mamahaling gamit, at edukasyon sa ibang bansa. Sa Australia niya nakilala si Mirna Salihin, isang kapwa Indonesian na galing din sa isang prominenteng pamilya.

Magkasundong-magkasundo ang dalawa. Mahilig sa arts, parehong may sosyal na lifestyle, at parehong ‘spoiled’. Naging matalik silang magkaibigan habang nag-aaral sa Sydney. Ngunit sa kabila ng lahat ng pagkakapareho, mayroon ding malinaw na pagkakaiba: si Mirna ay tahimik at simple, habang si Jessica ay palaban at gustong laging nasa sentro ng atensyon.

Simula ng Lamat

Matapos ang kolehiyo, bumalik si Mirna sa Jakarta. Si Jessica naman ay nanatili sa Sydney. Habang ang buhay ni Mirna ay tila perpekto—masayang relasyon, magandang karera, at suporta ng pamilya—unti-unting bumagsak si Jessica.

Naging depresibo siya matapos ang isang magulong relasyon. Ayon sa mga ulat, ilang beses siyang nagtangkang wakasan ang sarili, na-ospital, at nawalan ng trabaho. Napuno ng galit at kawalan ang kanyang mundo, lalo na nang hindi siya imbitahan sa kasal ni Mirna.

Maraming nagsasabi na ang sugat sa pagitan ng dalawang dating magkaibigan ay lumala nang payuhan ni Mirna si Jessica na hiwalayan ang kanyang abusadong nobyo. Hindi ito tinanggap ng magaan ni Jessica—at mula noon, tuluyan nang nasira ang kanilang relasyon.

Ang Imbitasyon

Disyembre 2015, muling nagparamdam si Jessica. Gumawa siya ng WhatsApp group at inaya sina Mirna at mga kaibigan na magkape sa isang kilalang café—ang Olivier Coffee sa Grand Indonesia Mall.

Sa kabila ng pag-aalinlangan, pumayag si Mirna. Wala siyang ideya na iyon na pala ang huling beses niyang makikita ang mundo.

Ang Araw ng Trahedya

Dumating si Jessica sa café 1.5 oras bago ang usapan. Sa CCTV footage, makikitang inikot niya ang lugar, pinili ang mesa na halos hindi kita sa camera, at iniayos ang mga shopping bag sa paraang natatakpan ang mga baso ng inumin.

Umakyat pa siya sa counter para umorder: dalawang cocktail at isang Vietnamese iced coffee—ang paborito raw ni Mirna.

Pagbalik sa mesa, nakita sa video ang tila kakaibang kilos ni Jessica: may inaayos sa mga baso, nagkakalikot ng hindi malinaw. Maya-maya, inilapag na ang mga inumin at naupo nang tila walang nangyari.

Nang dumating sina Mirna at isa pang kaibigan na si Hani, masigla silang binati ni Jessica. Ipinilit ni Jessica na si Mirna ang uminom ng iced coffee. At sa unang lagok pa lang—bumula ang bibig ni Mirna, nagsuka, at nawalan ng malay.

Walang Halong Emosyon

Habang nagsisigawan ang mga tao sa café at tinatawag ang ambulansya, nanatiling kalmado si Jessica. Hindi man lang siya lumapit kay Mirna. Wala siyang ipinakitang pag-aalala—isang bagay na kapansin-pansin para sa isang “kaibigan.”

Pinagtataka pa lalo ng mga tao ang kilos niya sa burol ni Mirna. Hindi siya umiiyak, hindi rin nagpakita ng lungkot. Sa halip, parang iritado pa siya.

Isang Lason, Isang Motibo

Tatlong araw matapos ang insidente, kinumpirma ng toxicology report na may nakamamatay na dami ng cyanide sa tiyan ni Mirna. Ang kape ang lumilitaw na nagdala ng lason sa kanyang katawan. Ngunit paano nakuha ni Jessica ang cyanide?

Walang direktang ebidensya kung saan niya ito binili. Ngunit dahil sa matalinong pagkatao at koneksyon, pinaniniwalaang nakuha niya ito sa black market.

The Trial of the Century

Noong Hunyo 2016, sinimulan ang kasong kriminal laban kay Jessica Wongso. Milyon-milyon ang tumutok sa bawat pagdinig. Ngunit imbes na malungkot o matakot, si Jessica ay ngumiti, kumaway sa media, at tila tuwang-tuwa sa atensyon.

Depensa ng kanyang kampo: walang sapat na ebidensya, walang cyanide sa ibang parte ng katawan ni Mirna, at posibleng may iba pang sanhi ng kamatayan.

Pero sa mga mata ng publiko, malinaw ang pattern. Jessica, na ilang beses nang nasangkot sa mga marahas na insidente sa Australia, ay hindi na isang inosenteng kaibigan. Isa siyang ticking time bomb.

Noong Oktubre 2016, hatol na ang lahat ay naghihintay.

Hatol ng Hustisya

Pinatawan si Jessica Wongso ng 20 taong pagkakakulong. Ipinagbunyi ito ng publiko, lalo na ng pamilya ni Mirna. Dahil sa kasunduan ng Australia at Indonesia, nakaligtas siya sa parusang kamatayan. Pero sa mata ng bayan, napatunayan: kaya ng isang kaibigan ang pumatay, lalo na kung ang puso ay puno ng inggit at galit.

Isang Aral na Mahirap Lunukin

Pagkatapos ng lahat ng ito, ang Vietnamese iced coffee ay naging sikat sa mga café sa Jakarta—hindi dahil sa sarap, kundi dahil sa kasaysayang nakakakilabot.

Ang istoryang ito ay paalala sa lahat: hindi natin palaging kilala ang mga taong malapit sa atin. Minsan, ang taong tinatawag mong “best friend” ay siya palang susubok pumatay sa’yo—sa isang basong kape, sa isang ngiting traydor, sa isang pagkakataong huli na ang lahat.