AJ Raval: “Aaminin ko na para matapos na.”

Lima na ang anak ng dating Vivamax sexy star na si AJ Rval.

Ito ang nakagugulat na rebelasyon ng 25-year-old actress sa live interview sa kanya ni Boy Abunda sa Fast Talk With Boy Abunda ngayong Miyerkules, Nobyembre 12, 2025.

“Aaminin ko na para matapos na,” pahayag ni AJ sa Cabinet Files ilang minuto bago nag-umpisa ang panayam sa kanya ni Boy.

Bago sumalang sa panayam, inaasahang aamin na si AJ na may dalawa na silang anak ng kanyang partner na si Aljur Abrenica.

Pero higit pa rito ang kanyang ipinagtapat.

Binalot ng katahimikan ang studio ng Fast Talk With Boy Abunda nang sabihin ni AJ na hindi lamang tatlo ang kanyang anak kundi lima—dalawa sa kanyang dating karelasyon na walang kaugnayan sa showbiz at tatlo kay Aljur

Ito ay makalipas ang ilang ulit na pagtanggi sa tuwing tinatanong siya sa interviews kung totoo ang usap-usapang may anak na siya.

At makalipas ang ilang taon ay umamin na nga si AJ na isa na siyang ina sa limang supling.

AJ RAVAL’S FIVE CHILDREN

Sa panayam ng Cabinet Files, sinabi ni AJ ang pangalan ng kanyang limang anak.

Ang panganay na si Ariana ay pitong taon ang edad.

Ang pangalawang si Aaron ay itinuturing niyang anghel dahil namatay ito sa edad na isa.

Ang mga supling nila ni Aljur ay sina Alkina, Aljur Jr., at Abraham.

Magdiriwang si Alkina ng kanyang ikatlong kaarawan sa Nobyembre 18.

Isang taon na si Aljur Jr., at kasisilang pa lamang ni AJ kay Abraham noong Setyembre 3, 2025.

Nagdiwang si AJ ng ika-25 kaarawan noong Setyembre 3, at ito rin ang araw na isinilang niya si Abraham.

Itinuturing itong isang blessing ni AJ dahil pareho ang petsa ng kanilang mga kapanganakan.

“Parang puwede na kaming mag-mall mamaya,” nakangiting sambit ni AJ sa Cabinet Files dahil malaya na niyang madadala at maipapasyal sa mall ang mga anak nila ni Aljur.

NOTHING TO HIDE FROM THE PUBLIC ANYMORE

Matapos ang panayam ni Boy kay AJ, biglang umaliwalas ang hitsura ng aktres.

Bakas sa kanyang mukha ang kaligayahan na nararamdaman dahil wala nang dahilan para ilihim niya sa publiko ang mga anak nila ni Aljur.

Kasama ni AJ sa studio ng Fast Talk With Boy Abunda ang ama niyang si Jeric Raval na buong-buo ang suporta sa kanya.

Sinabi ni Jeric na mabuti na ang pag-amin na ginawa ni AJ para hindi na itinatago ang kanyang mga apo.

Nabanggit din ni Jeric sa Cabinet Files na muntik nang hindi matuloy ang guesting ni AJ sa programa ni Boy dahil kinabahan ang kanyang anak.

Pinayuhan ni Jeric si AJ na huwag mag-back out dahil nakakahiya kaya natuloy ang panayam ni Boy.

Maganda ang naging resulta ng panayam ni AJ dahil malayang-malaya na ngayon ang pakiramdam ng aktres.