Hanoi City, Vietnam –
Isang eksenang tila hinango sa pelikula ng katatakutan ang naganap pasado alas-dose medya ng tanghali, Oktubre 13, 2023. Karaniwang araw lamang para sa isang mangingisda at asawa nito sa Red River, isang kilalang lugar ng pangingisda sa Hanoi—ngunit ang kanilang matutuklasan ay magbabago sa takbo ng buong imbestigasyon sa bansa.

Habang nagbabangka, napansin ng mag-asawa ang isang bagay na palutang-lutang. Akala nila’y laruan o artipisyal na paa, ngunit nang lumapit sila, dito na sila napatigil: isang totoong binti ng tao ang kanilang natagpuan.

Ilang metro pa ang layo, isa na namang nakapangingilabot na bagay ang bumungad—isang pugot na ulo na halos hindi na makilala. Dali-dali silang tumakas pabalik sa pampang at tumawag ng pulis.

Pagbubunyag ng Mas Malaking Misteryo

Sa pagsisiyasat ng mga awtoridad, natuklasan pa ang iba’t ibang bahagi ng katawan na nakatago sa ilalim ng mga bato at tinabunan pa ng semento. Ayon sa forensic report, ilang araw na itong nababad sa tubig, nasa advanced state of decomposition na.

Ang tanging palatandaan? Isang maliit na tattoo sa bukong-bukong.

Dahil dito, isinailalim sa DNA at fingerprint profiling ang bangkay. Pagkaraan ng ilang araw, natukoy ang pagkakakilanlan ng biktima:

👉 Si Hò Yến Nhi, 17-anyos, isang college student at beauty queen.
Isang rising star sa Vietnam, kinilala siya bilang 2nd Runner-Up sa Miss AAW De Vietnam Pageant nitong Enero 2023. May mga endorsements, photoshoots, at pangarap na maging artista.

Ngunit lahat ng ito’y biglang naglaho sa isang malagim na paraan.

CCTV: Ang Huling Mga Sandali ng Beauty Queen

Sa backtracking ng pulisya, nakita sa CCTV si Yến Nhi na pumasok sa isang apartment kasama ang isang lalaki noong Oktubre 10. Normal ang kilos—parang magkaibigan. Ngunit ilang oras matapos noon, dalawang lalaki ang lumabas ng parehong kwarto, may dala-dalang malaking styrobox.

Si Yến Nhi? Hindi na muling lumabas.

Ang Suspek: Isang 38-anyos na Lalaki

Kinilala ng pulisya ang kasama niya bilang Tadoy Khan, isang 38-anyos na lalaki, hiwalay umano sa asawa, at nag-uupa ng apartment sa Hanoi. Sa pagsalakay ng pulisya, natagpuan sa kanyang kwarto ang mga bakas ng dugo na nag-match sa DNA ng biktima.

Nang maaresto, umamin si Tadoy. Ayon sa kanya, nagkaroon sila ng relasyon ni Yến Nhi matapos silang magkakilala sa isang event. Ngunit sa likod ng kanyang pagpapakilalang “mayaman at matagumpay,” siya pala ay baon sa utang.

Ikinuwento niya na umutang daw ng 50 million Vietnamese Dong (₱120,000) ang beauty queen, ngunit nang hindi agad nakabayad, nagkaroon sila ng matinding pagtatalo. Dito na, ayon sa kanya, nangyari ang krimen.

Ang Paghiwa-hiwalay ng Katawan

Sa kanyang sariling salaysay, sinabi ni Tadoy na matapos niyang patayin si Yến Nhi, pinutol-putol niya ang katawan nito sa banyo ng apartment, inilagay sa styrobox, at itinapon sa Red River.

Ang ibang bahagi ng katawan ay isinilid pa niya sa isang hukay na tinabunan ng bato at semento—na kalaunan ay natuklasan din ng mga pulis.

Hatol at Hustisya

Noong Setyembre 2024, matapos ang halos isang taong paglilitis, nahatulan si Tadoy Khan ng parusang kamatayan para sa kasong murder, at karagdagang limang taon para sa robbery (dahil itinapon niya rin ang dalawang cellphone ng biktima sa ilog).

Mga Tanong na Naiwan

Ngunit sa kabila ng kanyang pag-amin, maraming palaisipan ang naiwan:

Totoo bang may relasyon sila, o manipulasyon lang ito ng suspek?

Totoo bang may utang ang beauty queen, o gawa-gawa lamang?

At higit sa lahat—paano nauwi sa ganitong kalunos-lunos na kapalaran ang isang dalagitang may maliwanag na kinabukasan?

👉 Isang kasong nagpapatunay na kahit ang mga bituin na kumikislap sa entablado, maaari pa ring madapa sa dilim ng mga lihim na hindi natin inaasahan.