Madalas nang ipinaaalala sa atin: Pwede mong pakialaman ang lahat — pero huwag na huwag ang asawa ng iba. Dahil ang kay Pedro ay kay Pedro, at ang kay Juan ay kay Juan.
Kapag tinawid mo ang linya na ’yan, hindi lang pamilya ng mag-asawa ang sinisira mo… kundi buhay mo na rin ang nakataya.

Sa bayan ng Waipahu, Honolulu County, Hawaii, isang 47-anyos na si John Tokuhara, kilalang acupuncture expert at may-ari ng isang matagumpay na health clinic, ay natagpuang duguan sa loob ng sariling opisina. Hindi ninakawan, hindi pinagnakawan ng gamit — pero apat na tama ng bala sa ulo ang dahilan ng kanyang agarang kamatayan.

At sa imbestigasyong sumunod, lumabas ang isang kuwento na kahit ang mga beteranong pulis ay napa-iling: isang bawal na relasyon, libu-libong malalaswang mensahe, at isang mister na sa mata ng batas ay walang direktang ebidensya laban sa kanya… pero sa mata ng hurado sa ikalawang trial, siya ang may sala.

Isang Doktor na Magaling Magpagaling… Pero Marami Palang Nasaktan

Si John, na walang asawa o anak, ay kilala bilang mabait, mapagbigay, at masipag. Mahilig sa outdoor sports, tutok sa negosyo, at nagbibigay ng scholarship sa kabataan. Ngunit sa likod ng imahe, natuklasan ng mga imbestigador na hindi lang sakit ng katawan ang ginagamot niya — pati sugat sa puso ng kanyang mga pasyente, siya mismo ang dahilan.

Isa sa mga naging pasyente niya ay si Joyce, asawa ni Eric Thompson — isang matagumpay na negosyante, may magandang bahay, at maganda ring pamilya. Sa simula, normal na therapy para sa back pain at fertility issues ang sadya ni Joyce. Pero sa dami ng follow-up sessions, ang ugnayan ay lumampas sa linya… at nauwi sa bawal na relasyon.

5,600 Mensahe ng Tukso

Nang mabuksan ng pulis ang cellphone ni John, natuklasan nila ang mahigit 5,600 na text messages sa loob lamang ng isang buwan sa pagitan niya at ni Joyce — puno ng matatamis na linya, mahahalay na larawan, at mga video.
Hindi lang ito fling; tumagal ito ng taon, at sa panahong iyon, tuluyang nabuntis at nanganak si Joyce — pero hindi doon nagtapos ang komunikasyon nila.

Pagtuklas ng Mister

Noong Hulyo 2021, nabuking ni Eric ang pagtataksil ng asawa matapos makita sa CCTV ng bahay nila na lumabas si Joyce alas-1 ng madaling araw habang siya ay nasa business trip. Sa halip na agad magwala, kinausap niya ito. Umamin si Joyce, at pinatawad siya ni Eric — may kondisyong ititigil na ang relasyon.
Pero, gaya ng maraming kwento ng tukso, hindi basta natatapos sa “itigil na natin ’to.”

Misteryosong Pagpatay

Enero 13, 2022 — alas-6:16 ng gabi, isang lalaking naka-sombrero, salamin, scarf, at may dalang brown shopping bag ang pumasok sa clinic ni John. Ilang segundo lang, lumabas siya nang nagmamadali, iniwan ang sombrero sa gitna ng kalsada. Kinabukasan, natagpuang patay si John.
Sa CCTV, ilang minuto bago iyon, nakita ring dumaan ang puting pickup truck na may plaka na tumugma sa sasakyan ni Eric.

Mga Ebidensya: Kulang Pero Mabigat

May baril si Eric na kapareho ng kalibre sa ginamit sa krimen, pero walang match sa mga shell casing.

Nakitang sinunog niya ang isang bagay sa bakuran ng bahay ilang minuto matapos bumalik mula sa direksyon ng clinic.

May postmarital agreement sila ni Joyce na pumapabor kay Eric sa kaso ng diborsyo, pinirmahan ilang araw bago ang pamamaril.

Sa unang trial noong 2023, nahati ang hurado — mistrial. Pero sa ikalawang trial nitong Pebrero 2025, iisa ang hatol: guilty. Habambuhay na pagkakakulong, may posibilidad ng parole.

Lahat Talunan

Umiyak si Joyce sa courtroom. Hindi na maibabalik ang buhay ni John, hindi na rin maibabalik ang pamilya ni Eric. At ang batang anak nila? Isa ring biktima.
Kaya sa huli, malinaw ang aral: Ang tukso, hindi mo kailangang labanan kung hindi mo papasukin.
At ang acupuncture? Dapat sa sakit ng katawan lang, hindi sa puso ng may asawa.