Balak magsampa ng pormal na reklamo ang kilalang negosyante at talent manager na si Beverly Labadlabad laban sa kaniyang alaga na si Elias Gabonada Lintucan, Jr., na mas kilala bilang Elias. Ayon sa kanya, nagkasala umano ang talent sa kasong Estafa through False Pretenses dahil sa patuloy na paghingi at pagtanggap nito ng pera mula sa iba’t ibang concert producers at event organizers nang hindi ito ini-remit sa management, gaya ng nakasaad sa kanilang kasunduan. 

Batay sa pahayag ni Labadlabad, may memorandum nang ipinadala kay Elias para magbigay siya ng paliwanag hinggil sa umano’y ilegal na pangongolekta. Kinumpirma rin ng personal assistant ni Elias, na si Ryan Porras, at ilan pang miyembro ng kanyang banda, na totoo ang naturang gawain.

Narito ang tala ng mga organisador at ang petsa kung kailan umano nangyari ang pangongolekta:

₱160,000 – Hulyo 12, 2025, Carmen

₱210,000 – Hulyo 14, 2025, Sagay

₱30,000 – Hulyo 16, 2025, GenSan

₱170,000 – Hulyo 18, 2025, Cabadbaran

₱157,500 – Hulyo 19, 2025, Mutia, Zamboanga del Norte

₱190,000 – Hulyo 24, 2025, Santiago

₱157,500 – Hulyo 26, 2025, Kwiky GenSan

₱190,000 – Hulyo 27, 2025, Esperanza

₱210,000 – Hulyo 30, 2025, Kabankalan

₱210,000 – Hulyo 31, 2025, Aloguinsan, Cebu

₱210,000 – Agosto 2, 2025, San Remegio, Cebu

₱15,000 – Agosto 3, 2025, Tropicana, GenSan

₱210,000 – Agosto 5, 2025, Dumarao, Capiz

₱210,000 – Agosto 7, 2025, Libungan, North Cotabato

Sa kabuuan, umaabot umano sa ₱2,330,000 ang natanggap ni Elias nang hindi dumadaan sa tamang proseso ng pamunuan.

Ayon kay Atty. Ferdinand Topacio, abogado ni Labadlabad, malinaw sa kanilang management contract na walang kapangyarihan si Elias na personal na mangolekta ng talent fee mula sa mga organizer o producer. Tanging ang management lamang ang may karapatan sa usaping pinansyal ng mga bookings.

Dagdag pa ni Atty. Ivan Patrick Ang, ang mga ginawa umano ni Elias ay maaaring magresulta sa maramihang bilang ng kasong estafa. Kung mapapatunayan sa korte, maaari itong magdala ng mabigat na parusa—kabilang na ang pagkakakulong ng mula 20 hanggang 40 taon o reclusion perpetua kung malaki ang halagang sangkot. Bukod pa rito, kailangan niyang isauli ang buong halaga sa management at sa mga apektadong organizers.

Sa kabila ng bigat ng akusasyon, wala pang opisyal na pahayag si Elias hinggil sa isyu. Samantala, patuloy na binibigyang-diin ni Labadlabad na kailangan ng hustisya para sa mga apektado at para na rin magsilbing babala sa iba pang talents na lumalabag sa kasunduan. Ayon sa kanya, hindi lamang pera ang usapin dito, kundi integridad at tiwala na siyang pundasyon ng anumang professional na relasyon.

Ang insidenteng ito ay kasalukuyang binabantayan ng mga netizen, lalo na ng mga taga-suporta ni Elias at ng kanyang banda. Marami ang umaasa na agad malilinawan ang isyu sa pamamagitan ng legal na proseso upang masiguro na ang tama ay mangingibabaw at mapapanagot ang sinumang lumabag sa batas.